قضاؤنا ... الى اين

السلام عليكم ورحمة الله وبركاته
هذي اول مشاركة لي في القروب واتمنى انها تنشر مشاركتي
واحب اشكر قروب ابو نواف في تميزه بطرح المواضيع وكل ماهو جديد في عالم الانترنت
وانا ما تجرأت وفكرت بالكتابه .. الا لمن شفت بعض المواضيع ( الشكاوي ) مثلشكوى جامعه الامام بنظامهم المزمت .. وشكوى موظفين الخطوط السعوديه

شكوتي انا " غــير " ممكن تكون جريئه شوي .. لكن اللي جرب القضاء السعودي راح يتاكد من صحة كلامي
سمعنا كثيرا .. من كنا صغر عن قضية " تحرير المرأه " وهنا في مجتمعنا .. تمركز هذا المصطلح وحصر في ( قيادة المرأة للسياره) فقط , وانا كغيري من بنات جيلي الحمد لله القيادة لم تشكل لنا مشكله كبيره .. يا كثر السواقين واذا ماكان السواق متوفر الله يخلي ابائنا موفرين لنا كل سبل الراحة
مشكلتنا ماهي في القيادة .. مشكلتنا في نظرة الرجل الى المرأة .. طبعا ماراح اتكلم عن الاب او الاخ ..لانه بيعامل اهله بكل احترام
موضوعي عن القضاء .. وكيف يعالج قضايا المرأه
واتوقع ان العلاج ماراح يكون في صف المرأه ..فقط لكونها " امرأه "
في كل الدوائر والجهات الجكومية ... مافيها قسم نسائي .. لازم ولي الامر يراجع للموضوع واذا كان ( خصمي هو زوجي " ولي امري) مين بيتابع لي موضوعي ؟؟
هالمشكلة شهدتها في المحكمة مع زوجه من جنسية عربية رافعه دعوة طلاق ضد زوجها .. ممنوع تدخل بدون ولي الامر ومن وين تجيب لها ولي امر غير زوجها اللي هو خصمها ؟؟
هذي اولا ...
ثانيا ...
القاضي ..وما ادراك ما القاضي ..
القاضي اللي مايوصل لهالمرتبه الا بعد مايكون درس تخصص شريعه .. ودراسته كلها في تحكيم شرع الله وسنة رسوله ..للاسف ماشفت ولا قاضي يطبق هالشرع
بتسالوني كيف...والله ماني متهجمه ضد القضاء ولا عندي اي اعتراض على حكم الدين الاسلامي .. لان الدين انصف المرأة لكن للاسف القاضي مو راضي ينصفه
:يتم الحكم في العاده بناء على :
1.
رجل او امرأه ,,فهو دائما نصير الرجل على المرأه ( خاصة في قضية طلاق )
2.
وبناء على الاصل وان كان المدعي او المدعي عليه .. اقرب له ومن جماعته فهو ( تلقائيا ) يتحيز له ويحكم له

راح اتكلم عن قضية الطلاق .. لان هالشيء شفته بنفسي في محاكمنا الموقره ..
بعد سماع شكوى الزوجه ضد زوجها وطلبها للطلاق .. وكذلك سماعه لاقوال الزوج التي بالتاكيد تناقض اقول الزوجه
يتم تاجيل الجلسه الى عدة جلسات .. وجلسه بعد اخرى حتى اخذت القضيه سنه كامله والشيخ يماطل في القضيه
شكوى الزوجه ان الزوج مريض نفسي +لايصلي
فاي شيخ يامل في الصلح ؟؟
ومع ذلك كان شيخنا عنده امل .. انقضت المده (سنه كاملة) وطال صبر الزوجه .. في الاخير وافق الشيخ على الانفصال
لكن ليس بالطلاق.بل بالخلع
والفرق ان الخلع ترجع له مهره ( كامل او نصفه ) ليس لعيب في الرجل بل لان الزوجه لا ترغب فيه ( مزاجها تبي تتركه )
يعني . كل هالادله والاثباتات اللي قدمتها للشيخ مايشوف انها كافيه لتنفيذ الطلاق بدون خلع ؟
والخلع .. بناء على اقوال الكثير من القضاة ( ترجع له نصف المهر وليس كامل ) لانه بعد الدخول عليه
والشيخ الموقر حكم باعادة المهر كاملا
(بالله عليكم مافيها تحيز ؟ )
هذا مثال بسيط جدا ...
طبعا وتتوالي القضايا بين الطليقين .. وطالت المده الى 3 سنوات مابين مطالبات ماليه وحضانه والخ الخ...
وطبعا كل قضيه تتاجل .. الى 3 او 5 قضايا وضاعت حقوق المسكينه بين اروقه المحاكم
هذا من جانب
من جانب اخر ... عادة ( بعض القضاة) ماعندهم ادب التعامل.. واعتقد كل من رجع في المحاكم بيأيد هالنقطة .. لانها اصبحت عادة عندهم
شيخ كبير بالعمر شيبته تفرض احترام الجميع له حتى الهنود بالشارع يعطفون عليه ويرحمون شيباته يجي يراجع القاضي في قضيه ما وهو ( المطلوم في هذه القضية ) ينهان ويتعرض للتهزيء ..ليه وين الاحترام؟ بغض النظر عن مشكلته مافيه ابد اسلوب للرد ؟
.. القاضي ..ينافخ .. ومعصب ويتشكى ويتافف من كثر المشاكل والقضايا اللي تجيه!
ماادري هم حاطينه بهالمنصب تطوع ( عمل اضافي ؟) اعتقد ان هذا شغله وهذا واجبه ليه دايم يرد على المراجعين من طرف
خشمه هذا غير الاستهزاء عليهم
لدرجه انه احدى القضاة عصب على المدعي وهدده انه يحذف عليه ( الدباسه !) بالله عليكم هذا اسلوب للتعامل؟
حديث شريف ولا اعتقد انه يخفى عن القضاة
قال رسول الله صلى الله علية وسلم (القضاة ثلاثة : واحد فى الجنة و اثنان فى النار, فاما الذى فى الجنة فرجل عرف الحق فقضى به , ورجل عرف الحق فجار فى الحكم فهو فى النار, و رجل قضى لناس على جهل فهو فى النار)
اين هم من تطبيق هذا الحديث ؟
فيه قضايا كانت المرأة تجيب الاثبابات والدلائل ( اوراق رسمية من مستشفيات ومراكز شرطه وغيرها ) وتسلمهم للقاضي
وهو يرميها في وجهها يقول انا مابغى اشوف شيء!!
اجل على اي اساس حضرته يحكم ؟
على الحدس والفراسة ؟؟
الله يرحم ايام زمان .. ايام الصحابه لمن كان الواحد فيهم يخاف يكون بهالمنصب لثقل المسؤوليه عليه !!
لخوفهم من حديث الرسول عليه الصلاة والسلام

اشوف القضاه يتخبطون في الاحكام يمنه ويسرة ..بعضها بدرايه وعلم منهم .. خاصه وان كان على معرفه سابقه مع المدعي عليه ( واسطه) او بعضهم بدون علم والدلائل موجوده ماتحتاج لتحري..لكن ربما كسل او عجز منه
يحكم جزافا ولا يعلم مدى تاثير هذا الحكم على الطرفين وهل بهذا الحكم قد نصر مظلوم
او نصر الشخص اللي بمزاجه لانه اقرب له نسبا ؟ والاخ من جماعته ؟ ومتوصي فيه ؟
ماادري وش هو الاهم بالنسبه للقاضي؟!!
والله مالقيت هالكلام من خيالي .. ولا صار تهجمي ضد بعض القضاة من فراغ
الا من واقع عشته وواقع ملموس ..
للاسف .. خابت امالي
ظنيت ان القضاء بينصفني ..
ولو القاضي ماقدر ينصفني لقصر الادله اقول ( معذور ) لكن يظلم حقي.. لان حظرته يحكم بالمزاج ؟
اي دين واي شرع يرضى بهذا ؟
بالاول كانت المطلقه تدعي على زوجها اللي ظمله
لكن الحين وبعد ماشافت القضاء عندنا والى اي مستوى صار
صارت تدعي على الزوج وعلى القضاة اللي ظلموه
لكن ما اقول الا ان الله مايضيع حق لها في الدنيااو الاخرة

اعذروني ع الاسلوب الركيك ..لاني اتكلم من حرقه قلبي فطلع الكلام بدون تنسيق
مادري.. هل لكلامي هنا ..صدى ؟
او .. مجرد فضفضه ؟؟