السلام عليكم ورحمة الله وبركاته ا

السلام عليكم ورحمة الله وبركاته ا

وبعد,

أحب أن أسطر لكم شوية كلمات من واقع التجربة الأليمة التي أمر بها أنا وأسرتي وقد تكون فيها الفائدة لكم أنتم أيضا:

انا ماماتي حبيبتي ربنا اخدها عندو , وكان يوم الاتنين من هذا الاسبوع،

الآن، انا مو زيكم اقدر اشوفها واكلمها واسمع نصايحهاخلاص دي اشياء راحت عليا

بافتكر صوتها لما كانت تناديني وتطلب مني اسويلها شي . وكنت اقول :يا الله كأنو مافي غيري, ولما كانت تصرخلي على اغلاطي كنت اقول: ياربي متى حيفهمو ان الحياه كدا وان الي باعملو بيعملو كل الي في سني...وبافتكر اشياء كتيييييييييييييييييييييييييييييييييييركنت اقولها واعملها باندم عليها دحين, باتمنى اني ماعملت كدا وماقلت كدا

رغم انها دايما ما كانت تتضايق لا مني ولا من أخواتي

بل تدعي لنا في سرها وجوا قلبها. وبفضل دعواتها احنا مستورين وموفقين والحمد لله.

الآن انتو كل يوم بتنامو و تصبحوا وماماتكم في وجهكم وأمام ا عيونكم, بتسمعوا صوتها, بتهزئكم, بتسبكم وبتعطيكم نصايح، ومع الأسف كتير مننا مانبغى نسمعها ليش ؟ لأنها كل يوم بتعيد نفس الكلام

والكتير منا يصبحوا منزعجين منها ومن طلباتها وصراخها, البعض بتأفف ويتنفر منها من اتفه طلب تطلبه مننا نطفش ونشتكيها لاصحاب

الآن اتمنى لو انها لسا عايشة لاخدمها واطيعها والبي طلباتها بكل نفس راضية واخد منها دعوات اكتر ورضا اكبر

انتو الان ليسا تقدروا تكلمو ماماتكم , تشكولها همومكم زي ما انا كنت اعمل.

ترا انا الحمدلله ماماتي كانت اقرب وحده ليا في البيت كولو, كل الي يعرفني يعرف اني انا واختي الصغيره روح وحده بس على قد مااحنا قريبين من بعض ماكان في اي مخلوق اقرب من ماما لينا.

الله يخليلكم اهلكم ويكبركم على طاعتهم

انا دخلت وشفت ماما بتتغسل !!!!

الله لايحط احد مكاني, شفتها بتتغسل وبتتكفن وشفت احبابها بيبكوا عليها وبيدعولها

دخلت وبوستها على جبهتها ، في البوسه دي افتكرت ال20 سنه الي عشتها معاها...عارفين ايش اكتر شي افتكرتو؟

افتكرت لما كانت حبيبتي في اخر ايامها في المستشفى وكانت غرقانة في عرقها وكنت اهويها لها بالولاقة، رغم انه كان المكيف عالي اعلى شي, كنت اهويها لين ما يديني الاتنين عوروني وكنت اضغط على نفسي واكمل, ماما قالتلي خلاص انا كويسه يكفي.عارفين ليه؟عشان شافتني تعبانه. فضلت راحتي على راحتها.بالله في ام احن واطيب منها؟

لاء مافي ومستحيل يكون في مخلوق على وجه الارض زي ماماتي !!

في مره من المرات كانت في البيت وانا معاها في الغرفه, كانت نايمه واناكنت بأقرا عليها القرآن لين مادوخت ونومت. بعدساعه بالزبط صحيت وروحت الحمام، الله يكرمكم. رجعت لقيتها صاحيه وبتقرا على نفسها, قلتلها ماما حبيبي نامي ترا سارلك اسبوع مانمتي(عشان كانت في المستشفى). ليش صحيتي مالحقتي تغفي حتا؟

قالتلي انتي تحسبيني نومت؟ انا من اول صاحيه الالم مانومني، كنت بأتألم بس ساكته عشان لااصحيكي من النوم انتي نومك خفيف

من يومها وانا كارها نفسي, قلت لاء ياربي مستحيل تكون خلقت ماما بدا القلب الطيب والحنون!! معقوله؟؟

كل ما افتكر لما بوستها قبل مايغسلوها وبعدها حضنتها وقلت في قلبي: ماما لاتوحشيني انا اكتر وحده تحبيني لاتبعدي عني>>>

ماابغى اطول اكتر من كدا بعد هدي التجربة الأليمة والمصاب الكبير بس أسأل الله أن يرضى عليكم والديكم دنيا واخره كما حصل معي ولله الحمد والشكر.

الوالدان هما سبب سعادتكم,لاتستنو لين ماتنحطوا في موقفي بعد عمر طويل عشان تحسوا بقيمة اهلكم . وهدي نصيحة من أخت لكم صادقة ومخلصة ان شاء الله.

ابغى طلب واحد انتو ماحتخسروا شي لو عملتوه بالعكس حتاخدوا اجر

ابغاكم تدعوا لماماتي ( إيمان ) ربنا يثبتها عند السؤال ويجعل القران انيس ليها في وحشتها ووحدتها وينور قبرها ويوسعوا على مد بصرها ويفتح لها شباك من الجنة تفوح منه ريح طيبة من الجنة تلطف عليها جو القبر وأن يغسلها الله بالماء والثلج والبرد وينقها من الذنوب كما نقى الثوب الأبيض من الدنس .. آمين.

وبالله عليكم ثقلوها بالدعوات بدل الدموع.

فحسب ما يقولو الشيوخ عندنا وقت العزا : الدموع ماتفيد الدعاء بس هوا الي يفيد

الله يصبرنا على بعدك يا احسن واحن ام لنا وزوجه لبابا في الكون كله

يا ست الحبايب

سبحانك اللهم وبحمدك
اشهد أن لا إله إلا أنت، استغفرك وأتوب اليك

مع تحيات ضــــــــــباب الهــــــــــــــدا

» السلام عليكم ورحمة الله وبركاته,,,
» السلام عليكم ورحمة الله وبركاته
» السلام عليكم ورحمة الله
» السلام عليكم ورحمة الله وبركاتهـ
» السلام عليكم ورحمه الله